निरुपाय असतो अनेकदा.
निरुपाय या शब्दामधला किंचित निर्विकार अलिप्तपणा ओलांडून जाणारी हतबलता.
हताशाही.
कुणाकुणाला अश्या वेळी परमेश्वराचा दगड लाभतो,
कुणा भाग्यवंताला अजून काही दिलासे.
पण
कुणाचाही-कसलाही आधार नाही,
असू शकत नाही,
टेकता येत नाही,
येणं शक्यतेतलंच नाही -
असं मानणार्‍याला मात्र -
आयुष्याचा आधार वाटतो.
कसलीही केविलवाणी झटापट न करता
मागचा आणि पुढचा रस्ता अंधाराला गिळू देत,
एकेका पावलापुरताच प्रकाश स्वीकारत,
एकापुढे एक पाऊल टाकत,
किडूकमिडूक-घासकुटका-चूकभूल-मूठपसा-अंगणआभाळ...
आपलंसं करत जगलेलं आयुष्य.
आज ना उद्या ते पोटाशी धरेल,
धरेलच,
अशा विश्वासाला पाणी घालत
वाट चालत राहतात लोक.
विश्वास वाढत राहतो त्याच्या-त्याच्या नशिबानं,
त्याच्या-त्याच्या गतीनं.
निरुपायच असतो अनेकदा.
